Napakyas ang plano sa usa ka 32-anyos nga lalaki nga makalikay human giingong nangawat og kwarta sulod sa usa ka fast-food chain sa Barangay Mabolo, Dakbayan sa Sugbo.
Ang suspetsado giila lamang sa alyas nga “Janjan,” walay trabaho, adunay live-in partner ug residente sa Barangay Mambaling sa maong dakbayan.
Base sa inisyal nga imbestigasyon sa Mabolo Police Station, giingong gikuha sa suspek ang shoulder bag sa biktima nga gibiyaan sa lingkuranan samtang kini mikuha sa iyang order.
Human makuha ang bag, migawas ang suspek sa establisyemento ug gikuha ang kwarta nga nagkantidad ug P1,000 nga cash, uban sa driver’s license, ug cellphone. Apan, nakadesisyon ang suspetsado nga ibalik ang bag sa biktima. Tungod niini, daling nasubay ug nadakpan sa mga naka-duty nga security guard ang suspek human nangayo og tabang ang biktima.
Depensa sa dinakpan nga nadala lamang matod pa siya sa tentasyon ug kalisod sa kinabuhi ug giingong gamiton unta niya ang kwarta alang sa pagpalit og tambal sa iyang kapuyo nga bag-o lang nakuhaan.
Sa pagkakaron ang akusado anaa na sa kustodiya sa Mabolo Police Station alang sa hustong proseso ug mag atubang ug tukmang kaso.
Photo Courtesy: Mabolo Police Station
