Kapin sa 17,000-ka barangay sa tibuok nasod ang nag-atubang sa hulga sa pagbaha ug pagdahili sa yuta. Tungod niini, gimandoan na sa Department of the Interior and Local Government (DILG) ang mga lokal nga panggamhanan nga maghimo og mga preventive measures sa dili pa mograbe ang sitwasyon, ilabina sa mga komunidad nga giila nga bulnerable sa baha ug landslide. Tumong niini nga mapanalipdan ang kinabuhi ug masiguro nga walay paglangan ang emergency response operations.
Gimandoan usab sa DILG ang mga lokal nga pangagamhanan nga magpahigayon og pre-disaster risk assessments batok sa nagkalain-laing hydrometeorological hazards sama sa baha, landslide, debris flow ug kusog nga hangin. Kinahanglan usab nga ipatuman ang preemptive o mandatory evacuation sa mga komunidad nga kanunay maapektuhan kung gikinahanglan. Kinahanglan usab nga masiguro ang kasaligan nga suplay sa kuryente ug operational generators sa mga evacuation center ug health facilities.
Gihangyo usab ang mga residente sa mga lugar nga ubos ang risgo sa landslide nga bantayan ang mga timailhan sa peligro, sama sa kalit nga pagbag-o sa agos sa tubig o ang pagkaputik sa tubig nga kaniadto tin-aw. Matod sa Department of Environment and Natural Resources–Mines and Geosciences Bureau (DENR-MGB), balido hangtod karon, Agosto 19, ang mga listahan sa mga barangay nga anaa sa hulga sa baha ug landslide.
Photo Courtesy: Copernicus
