Gihingusgan ang Simultaneous Anti-Criminality Operations sa Davao Norte Police Provincial Office (DNPPO), isip kabahin sa kampanya batok kriminalidad sa tibuok probinsya.
Sa pakighinabi sa Juander Radyo Tagum, base sa gipresentar nga datos, ang droga, loose firearms, wanted persons, illegal gambling, ug mga paglapas sa ubang espesyal nga balaod ang mga nag-unang target sa kapulisan.
Sa operasyon batok sa ilegal nga droga, nakatala ang DNPPO og 29 ka malampusong operasyon, diin nanguna ang Panabo City nga adunay 10 ka operasyon, gisundan sa Santo Tomas nga adunay 4, ug Tagum City nga adunay 3 ka successful operations.
Samtang, sa kampanya batok sa wanted persons, nakarekord ang kapulisan og mga successful nga pagserbi sa warrant of arrest, lakip ang 14 ka wanted persons ug 24 ka other wanted persons nga nadakpan o naserbisyohan og warrant.
Sa kampanya batok loose firearms, nakatala usab ang kapulisan sa Davao del Norte og 29 ka successful operations. Aduna usab silay 6 ka operasyon batok sa illegal gambling ug 24 ka successful operations may kalabotan sa pagpatuman sa ubang special laws.
Gipasabot usab sa kapulisan ang kalainan sa search warrant ug warrant of arrest, kung diin ang search warrant maoy legal nga awtoridad sa pagpangita ug pagkumpiska sa mga butang nga may kalabutan sa usa ka krimen, samtang ang warrant of arrest maoy mando sa korte alang sa pagdakop sa usa ka tawo nga gipasanginlan og paglapas sa balaod.
Pinaagi sa padayong anti-criminality operations, tumong sa DNPPO nga mapakusgan ang pagpatuman sa balaod, mapugngan ang kriminalidad, ug mapalambo ang kalinaw ug seguridad sa mga komunidad sa Davao del Norte.
