Gipahimangnoan sa Council for the Welfare of Children (CWC) ang publiko ug mga media outlet nga unahon ang kaluwasan, pribasiya ug katungod sa mga batang naapektuhan sa shooting incident sulod sa campus sa Ateneo de Zamboanga University Junior High School sa Zamboanga City.
Sa inisyal nga report, usa ka Grade 9 nga estudyante ang giingong suspek, diin namatay ang usa ka Grade 10 nga estudyante ug nasamdan ang labing menos tulo pa ka mga tawo.
Matud ni CWC Executive Director Undersecretary Angelo Tapales, kinahanglan dili malimtan nga luyo sa matag balita adunay mga bata ug pamilya nga mahimong maapektuhan sa dugay nga panahon.
Busa, iyang gihangyo ang publiko, media workers ug content creators nga likayan ang pagpakaylap sa wala pa mapamatud-ang impormasyon, graphic nga mga hulagway o video, livestreams ug sensitibong detalye nga mahimong makahatag og dugang trauma, stigma ug peligro sa mga batang nalambigit.
Padayon nga gibantayan sa CWC ang sitwasyon ug nakigtambayayong sa mga may kalabotang ahensya aron maseguro ang proteksyon ug kaayohan sa mga bata.
Samtang gipasiugda usab sa konseho nga bisan biktima, saksi o bata nga nalambigit sa kaso, ang usa ka menor de edad nagpabiling bata ug adunay katungod sa pribasiya, dignidad, seguridad ug proteksyon.
Phoyo Courtesy: Council for the Welfare of Children
