Nagpatigayon sang duha ka adlaw nga ebalwasyon ang Commission on Higher Education ukon CHED Technical Panel for Engineering and Technology sa Sultan Kudarat State University-Isulan Campus ukon SKSU para sa proposed Bachelor of Science in Petroleum Engineering program.
Ang nasambit ang evaluation, natigayon sang Agosto 13 tubtob 14 bilang kabahin sang aplikasyon sang SKSU para sa preliminary assessment kag pag-isyu sang Report on the Result of the Preliminary Assessment ukon RRPA.
Ginpahayag ni SKSU President Atty. Cyrus E. Torreña ang suporta sang unibersidad sa programa kag ang commitment sini nga magsunod sa mga polisiya, standards kag guidelines sang CHED.
Ginpresentar sang SKSU team ang mga dokumento kag ebidensya parte sa program administration, faculty, curriculum, student support, laboratoryo kag library resources. Ginsundan ini sang ocular inspection sang campus facilities. Nakigsinapol man ang CHED Technical Panel kag SKSU representatives kay Lambayong Mayor Francis Eric E. Recinto kag iya team para paga-talakayon ang suporta sang lokal nga gobyerno sa proposed program.
Samtang ginbisita man sang grupo ang SK Liguasan Oil and Gas Corporation, nga ginakonsiderar bilang dugang nga laboratory facility kag posible nga internship site para sa palaabuton nga mga estudyante sang Petroleum Engineering.
Sa pagtakop sang evaluation, ginpresentar sang Technical Panel ang ila findings kag recommendations. Nagpasalig naman ang SKSU nga aksyonan ang mga obserbasyon kag ipadayon ang pagsunod sa mga kinahanglanon sang CHED.
Photo Courtesy: SKSU
