Arestado sang joint police operatives ang isa ka Top 5 Most Wanted Person sa Regional Level sang Police Regional Office 12 nga ginakabig nga isa sa mga suspek sa ambush nga nagpatay sa duha ka pulis sa Lambayong, Sultan Kudarat. Nadakpan ang suspek nga ginakilala sa alyas nga “Dondi” sa Barangay Poblacion, Ampatuan, Maguindanao del Sur, banda alas-4:40 sang hapon sang Agosto 18, 2026.
Ang pag-aresto ginpatuman base sa mga warrant of arrest para sa kaso nga murder, may kaangtanan sa ambush sang Hulyo 7 sa Barangay Tinumigues, Lambayong, diin napatay ang duha ka personnel sang RMFB 12.
Suno sa kapulisan, nakabaton sila sang impormasyon nga yara ang suspek sa isa ka night market. Gilayon nga nagresponde ang mga operatiba kag nadakpan ini.
Yara na sa kustodiya sang Ampatuan Municipal Police Station ang suspek para sa dokumentasyon kag pag-atubang sa nagakaigo nga proseso sa korte. Padayon naman ang imbestigasyon sang kapulisan para matukib kag madakpan ang iban pa nga posible nga suspek sa ambush.
Photo Courtesy:Regional Public Information Office 12
