Mibida karon sa international stage ang 20-anyos nga Cebuana nga si Khylem “Khy” Progella human makadaog og gold medal sa Volleyball World Beach Pro Tour Futures sa Busan, South Korea. Gikan sa court sa volleyball sa barangay Labangon syudad sa Sugbo.
Kauban ang UST teammate nga si Sofiah Pagara sa Misamis Oriental, nahuman sa duha ang ilang pito ka duwa nga walay kapildihan gikan sa qualification round hangtod sa finals.
Mas impresibo ang ilang kampanya human gipildi sa Progella-Pagara tandem ang paboritong all-Filipino pair nga sila Sisi Rondina ug Bernadeth Pons, nailhan nga “SiPons,” sa championship match, 21-18, 21-13.
Nahimo kining historic 1-2 finish alang sa Pilipinas, diin nakuha sa Progella-Pagara ang gold ug silver naman alang kang Rondina ug Pons.
Nagsugod ang volleyball journey ni Progella sa Grade 2 sa Labangon Elementary School, una pa siya nakadula alang sa Southwestern University ug University of Southern Philippines Foundation.
Sa UST, nahimo siyang importanteng player sa beach volleyball program ug nakadaog og sunod-sunod nga UAAP girls’ high school beach volleyball championships, lakip ang Season 85 crown diin siya usab gihatagan og Most Valuable Player award.
Photo courtesy: Bernadeth Pons
