Nadiskubrehan sa kapulisan sa Peru ang usa ka karaang mummy sulod sa cooler bag sa usa ka delivery worker nga ilang gipahunong duol sa usa ka archaeological site sa Peru.
Gisusi sa mga pulis ang iyang mga gamit human namatikdan nga hubog ang maong lalaki, ug didto nakit-an ang mummy nga iyang gipanganlan og “Juanita” nga iya unta ipakita sa iyang mga higala ug giingong gipanag-iya sa iyang amahan.
Gikumpirma sa mga eksperto nga dili babaye ang mummy, kundili usa ka hamtong nga lalaki nga gibanabana nga namatay 600 hangtod 800 ka tuig na ang milabay, kapin 45 anyos ang edad ug 1.51 metros ang gitas-on sa maong mummy.
Gibutang ang mummy sa fetal-like position ug giputos sa panapton, usa ka pamaagi sa paglubong nga nalambigit sa mga pre-Hispanic nga kultura sa rehiyon, samtang gitugyan na kini sa Ministry of Culture alang sa hustong pagpreserba ug pagtuon.
Gidakop usab ang delivery worker ug duha niyang higala nga 23 hangtod 26 anyos samtang gisusi sa mga awtoridad ang posibleng paglapas sa balaod sa pagpanalipod sa cultural heritage sa Peru.
Photo Courtesy:NY Post
