Gipangita sa usa ka gasolinahan sa Barangay Laguitas, Malaybalay City, Bukidnon ang driver sa usa ka pula nga 10-wheeler truck tungod sa wala nadawat nga bayad nga ₱12,000 sa krudo nga ilang gipa-gas kagabii Agosto 17, 2026. Ang maong truck nga adunay kargang tahop giingong padulong unta sa dakbayan sa Cagayan de Oro.
Sumala sa impormasyon gikan sa maong estasyon, e-wallet nga GCash ang gigamit sa driver isip paagi sa pagbayad. Gipakita sa driver sa pump attendant ang usa ka screenshot isip pamatuod sa transaksyon, nga gidali usab og ipadala sa attendant ngadto sa ilang group chat aron ma-verify sa ilang opisina. Apan sa gihimong pagsusi sa ilang mga personnel, nadiskobrehan nga ang maong screenshot dili pa successful o kompleto, ug walay nisulod nga pondo sa ilang account. Nakabiya na ang truck sa wala pa kini hingpit nga ma-verify tungod usab sa pasirado na nga oras sa estasyon.
Tungod kay wala pa makuha sa gasolinahan ang plate number sa sakyanan, nagpahigayon na sila og pag-review sa ilang mga CCTV footage aron mailhan ang driver ug ang sakyanan.
Gi-awhag usab sa pamunoan sa gasolinahan ang publiko nga kung kinsa man ang makaila ug makamatikod sa maong pula nga 10-wheeler truck o sa trucking company niini nga makig-coordinate gilayon kanila aron mahan-ay ug masulbad ang maong isyu.
Photo Courtesy: Angelica Tangkilan Gamas
