Patay ang driver sa 10-wheeler Isuzu truck human kini nawad-an og kontrol ug nabaliskad paingon sa pikas linya sa Sayre Highway, Barangay Dicklum, Manolo Fortich, Bukidnon, niadtong Biyernes, Agosto 14, 2026.
Sumala kang PLTCOL Rogie C. Ortencio, hepe sa Manolo Fortich MPS, gikan sa BUSCO sa Quezon, Bukidnon ang maong truck ug padulong unta sa Barangay Agusan, Cagayan de Oro City aron ihatod ang kargang white sugar.
Gituohan sa mga awtoridad nga ang kabug-aton sa karga ug ang pabahada ug medyo kurbadang dalan duol sa DPWH area maoy posibleng nahimong hinungdan sa maong aksidente.
Nagdala ang truck og mokabat sa 500 ka sako sa asukal—nga nagtimbang og gibana-banang 50 kilos matag sako o labaw sa 25,000 kilos ang kinatibuk-ang gibug-aton—diin dul-an sa 150 ka sako ang nangatagak ug nagkatag sa kadalanan human sa pagkabaliskad.
Sa pagkakaron, nagpadayon pa ang gihimong imbestigasyon sa mga otoridad aron matino ang eksaktong hinungdan sa maong trahedya, lakip na ang pag-susi kon nalapas ba sa gitugot nga carrying capacity sa 10-wheeler truck ang gidaghanon sa gipang-karga niining asukar.
Photo Courtesy: Manolo Fortich BFP
