Upat ka mga indibidwal lakip ang usa ka school supervisor ug tulo ka school principals nga naluwas ra human nahulog ang ilang sakyanan sa pampang sa Purok 2, Barangay Litapan, Josefina, Zamboanga del Sur, adlawng Lunes, Agosto 17.
Sumala sa inisyal nga imbestigasyon, gikan sa Cotabato City padulong sa Piñan, Zamboanga del Norte ang Isuzu MUX SUV sa dihang nawad-an og kontrol ang driver tungod sa kusog nga ulan ug danlog nga dalan.
Gilikay unta sa nagmanehong driver ang sakyanan sa nagpadulong nga van apan aksidente hinoon kini nga nahulog sa pampang kay wala na niya makontrola ang manibela.
Dali nga mitabang sa pagluwas sa upat ka biktima ang mga police personnel sa 1st Zamboanga del Sur Provincial Mobile Force Company nga nagsakay sa maong sakyanan.
Gidala ang upat sa Josefina Rural Health Unit alang sa medical attention ug giingong stable ang ilang kahimtang. Walay nakabsan sa kinabuhi sa maong insidente, samtang padayon ang imbestigasyon sa Josefina Municipal Police Station aron masuta ang tinuod nga panghitabo.
Photo Courtesy: ZSPPO
