Patay nang napalgan karong buntag ang usa ka 38 anyos nga lalaki nga taga Dumalinao, Zamboanga del Sur human gikatahong nalumos ug na-missing kagahapon, Agosto 17, 2026 sa usa sa mga beach resort sa Barangay Alindahaw, Tukuran, Zamboanga del Sur.
Nasayran sa imbestigasyon nga ang biktima uban sa iyang amo ug uban pang mga kauban nag-celebrate sa usa ka birthday sa usa ka resort sa maong lugar. Samtang nag-inom ug ilimnong makahubog, naligo sa dagat ang biktima uban sa iyang mga kauban.
Matud sa usa ka kauban, nikawas na unta sa tubig ang biktima ug miingon nga moadto sa ilang cottage, apan sa kakusog sa balod nawala na sa ilang panan-aw ang biktima.
Ulahi na matud pa sila nga nakadungog ug singgit sa tawo nga nangayo ug pakitabang, ug sa ilang pagpangita wala na nila kini nakit-an pa
Nakigkoordinar dayon ang Tukuran Municipal Police Station sa Philippine Coast Guard ug sa Tukuran MDRRMO alang sa Search and Rescue Operation.
Sa pagkakaron gipahiluna na ang patayng lawas sa biktima sa nagbangutang pamilya.
Photo Courtesy: PIO ZSPPO
