Personal nga mitambong si Presidente Ferdinand “Bongbong” Marcos Jr. sa pag-apod-apod sa pinansyal nga ayuda ug bugas sa mga benepisyaryo sa Negros Oriental niadtong Agosto 17, 2026.
Gipangulohan ni Marcos ang ceremonial turnover sa P20,000 nga pinansyal nga tabang ngadto sa 250 ka scholars gikan sa Dumaguete City ug mga lungsod sa Valencia ug Bacong. Ang scholarship gipondohan pinaagi sa socio-civic projects fund sa Bawat Barangay Makikinabang program.
Gilauman nga 2,785 ka scholars gikan sa 557 ka barangay sa probinsya ang makabenepisyo sa maong programa. Matag barangay gigahin og P200,000, diin P100,000 alang sa lima ka scholars ug ang laing P100,000 alang sa lokal nga mga proyekto ug pagpalambo sa basic services.
Gibutyag sa Presidente nga ang tabang alang sa edukasyon gitumong aron matabangan ang mga scholars nga makapadayon ug makahuman sa ilang pagtuon.
Atol usab sa iyang pagbisita, 2,230 ka benepisyaryo sa Barangay Talay, Dumaguete City ang nakadawat og tig-10 ka kilo nga bugas isip kabahin sa mga programa sa gobyerno batok sa kagutom.
Human sa mga kalihokan sa Dumaguete, mibisita usab si Marcos sa 302nd Infantry Brigade sa Camp Leon Kilat sa Tanjay, diin iyang gipasalamatan ang papel sa militar sa pagmintinar sa seguridad ug iyang gidasig ang mas lig-on nga koordinasyon sa mga lokal ug nasyonal nga ahensya.
Photo Courtesy: Negros PIO
