Nakaplagan ang bukog sa tawo sa kasagbotan nga bahin sa Purok 2, Sitio Cayutan, Barangay Cagniog, Dakbayan sa Surigao. Sumala sa report, nakadawat og tawag sa cellphone ang Surigao Component City Police Station, gikan sa usa ka concerned citizen nga kabahin sa nadiskobrehan nga kalabera.
Dali nga giadtoan sa kapulisan ang lugar kauban ang mga imbestigador aron susihon ang report. Pag-abot sa mga pulis, ilang nakita ang nagkatag nga mga bukog nga gituohang sa tawo.
Nakaplagan usab didto ang usa ka digital relo. Base sa inisyal nga imbestigasyon, adunay pipila ka bukog nga wala na didto, lakip na ang ulo sa kalabera. Gimontaran sa police line aron dili matandog ang mga ebedensiya nga magamit sa imbestigasyon. Giadtoan usab sa Surigao del Norte Provincial Forensic Unit (SDNPFU) ang lugar alang sa dugang eksaminasyon ug dokumentasyon.
Padayon pa ang imbestigasyon sa kapolisan aron mahibal-an ang posibleng mga sirkumstansya sa kamatayon sa biktima og identidad niini.
