Viral karon sa Chinese Social Media ang mga litrato sa usa ka lalaking leon gikan sa Guangzhou Zoo sa nasud sa China tungod sa talagsaon niini nga buhok.
Makita sa hulagway sa usa ka leon nga adunay bangs sa atubangan ug mullet sa likod ang balhibo niini, hinungdan nga daghang netizens ang nangutana kung giputlan ba o gikortihan ba ang balahibo niini sa mga nag-atiman sa zoo.
Aduna pay mga nagkomento nga tungod sa talagsaon nga hairstyle, mas dili na matud pa kini tan-awon nga bangis sama sa kasagarang mga leon nga makita sa kalasangan, ug matud pa daw dunay artista sa China nga kahulagway sa Leon.
Tungod niini, adunay mga nangagpas nga basin tinuyo nga gi-style sa zoo staff ang maong leon, apan gilimod kini sa usa ka tigpamaba sa Guangzhou Zoo, og matud pa walay tawo nga naggupit o nag porma sa buhok sa maong leon.
Natural lamang matud nga naporma ang talagsaong itsura tungod sa paagi sa paglimpyo sa leon sa kaugalingon nga balahibo, samtang kanunay niini nga gilimpyohan ang lawas ug ang iyang balahibo, nga adunay mga bahin sa buhok nga natural ug naporma ngadto sa mura’g bangs ug mullet.
Busa, ang leon nga murag bag-o lang migawas sa barbershop, wala diay kini alote ug tawo, natural ra gyud kini nga hairstyle resulta sa kaugalingon niyang pag disinyo sa iyang balhibo.
Photo Courtesy: Instagram
