Malipayong gidawat sa napulo (10) ka mga ginikanan sa child laborers sa New Corella ning probinsya sa Davao del Norte, ang livelihood assistance nga gitagana alang kanila.
Gipahigayon ang pagtunol sa Individual Starter Kit nga mokantidad P20,000 matag usa ubos sa DOLE Assisted Livelihood Project kagahapong adlawa, Agosto 17, 2026 sa Mayor’s Office, Conference Room.
Mitambong ang mga bisita nga mao sila Sonia Delfin, ang DOLE DavNor Provincial Director; Harris Egina, ang Staff from the Office of the DOLE Secretary Francis Tolentino; ug Dave Andrie Villegas, amg Child Labor Focal uban nila Municipal Administrator Roselito Maligro ug PESO OIC Al Biotumas. Gikalipay sa mga ginikanan ang maong tabang isip puhonan sa pagsugod ug pagpalambo sa ilang napiling panginabuhian.
Gipasabot sab sa DOLE nga dili lamang pinansyal nga tabang ang tumong sa programa, kondili ang paghatag og oportunidad sa mga ginikanan nga makabaton og lig-ong panginabuhian, aron masuportahan ang panginahanglan sa pamilya nga dili magsalig sa pagpanarbaho sa mga anak nga bata pa ug aron sa hingpit mabatokan na ang child labor.
Photo Courtesy: Bayan Ng New Corella
