Luwas kag wala sang pilas matapos ginluthang sang wala pa makilala nga suspek ang ginasakyan nga pick-up truck ni Rajah Buayan Sangguniang Bayan Member Bin-Nazriff Buayan Utto Silongan sa bahin sang Brgy. Tinumiges, Lambayong, Sultan Kudarat.
Suno sa konsehal, halin sila sa syudad sang Tacurong matapos gindul-ong ang pipila ka kabataan kag pabalik na suno pa sa Rajah Buayan sang hinali lang ginpalupukan sang isa ka sahi sang pusil sang wala pa makilala nga lalaki kun sa diin nagatambay sa kilid sang kadalanan nga may tupad nga motor.
Nangin mapinasalamaton ang nasambit nga opisyal nga luwas ang apat ka abyan kag parente nga nakasakay sa nasambit nga salakyan. Ginpaathag man ni Silongan nga wala siya sang nangin personal nga kalaban agud himuon sa iya ang nasambit nga krimen.
Sa pagkakaron, nagapadayon ang imbestigasyon sang kapulisan agud mahibaluan ang posible nga rason sang pagpangluthang.
