Gipangusgan ni Parañaque 2nd District Representative Brian Yamsuan ang pagpasaka sa sweldo sa mga magtutudlo sa Special Needs Education o SNED aron madugangan ang ihap sa mga kwalipikadong magtutudlo sa mga pampublikong eskwelahan.
Gilakip kini sa House Bill No. 5574 nga gisumite ni Yamsuan, nga nagtumong nga masiguro ang igo nga ihap sa SNED teachers sa elementarya ug sekondarya nga mga pampublikong eskwelahan.
Matud ni Yamsuan, sa School Year 2024-2025, mokabat sa 391,000 ka learners with disabilities ang naka-enrol sa mga pampublikong eskwelahan sa nasud, apan anaa lamang sa 6,000 ka SNED teachers nga nag-atiman kanila.
Sa pagkakaron, ang mga SNED teachers anaa sa Salary Grade 14, nga adunay binuwan nga sweldo nga ₱38,764. Ubos sa sugyot, kung mahimong balaod, ipataas ang ilang sweldo ngadto sa ₱45,694 kada bulan karong tuiga ug mosaka pa ngadto sa ₱47,829 kada bulan pag abot sa 2027.
Gipasiugda ni Yamsuan nga ang matag estudyante angay hatagan og patas nga oportunidad sa edukasyon, ug matuman lamang kini kung adunay igo nga mga SNED teachers sa mga pampublikong eskwelahan alang sa mga estudyanteng adunay disability.
Tumong sa maong sugyot nga dili lamang mapaayo ang kompensasyon sa mga SNED teachers, kondili madani usab ang mas daghang kwalipikadong magtutudlo nga mosulod ug magpabilin sa special needs education.
Photo courtesy: DepEd Tayo – Sindangan Pilot Demonstration School
