Mokabat sa 1,700 ka Pilipino nga nagplano unta nga moadto sa Central Europe aron mag trabaho ang naluwas gikan sa posibleng pagpanglimbong human maaresto ang usa ka giingong illegal recruiter nga nagtanyag og peke nga employment opportunities.
Sumala kang Department of Migrant Workers o DMW Secretary Hans Leo Cacdac, ang suspek sa giingong large-scale illegal recruitment mao si Mazhoor Ubongin Khusin, nga nailhan usab sa alyas nga “Maz.”
Naaresto si Khusin niadtong Hulyo 2026 sa Mexico, Pampanga nga nagsilbi isip opisyal sa ALJU International Manpower Services, Inc., usa ka recruitment agency nga kaniadto nag-atubang og mga regulatory sanction tungod sa pagtanyag og peke nga mga oportunidad sa trabaho, taas nga placement fees, ug kapakyasan sa pag-reimburse o pag-refund sa mga apektadong aplikante.
Human niini, gikansela na ang awtoridad sa maong ahensya sa pag-recruit og mga Pilipino nga gustong magtrabaho sa Europe.
Ang modus operandi sa suspek mao ang pagtanyag og mga trabaho sa Poland, Lithuania ug Czech Republic isip mga trabahante sa pabrika, mag-uuma ug mga trabahante sa hotel ug misaad og sweldo nga P90,000 kada bulan.
Aron maangkon ang giingong trabaho, ang mga aplikante gipangayoan og placement fee nga gikan sa P80,000 ngadto sa P130,000.
Photo courtesy: assistance.ph
