Nasikop sa mga jail guards sa Lianga District Jail ang usa ka lalaki nga giila sa alyas nga “Choy2x,” 34 anyos ug residente sa Purok 2, Barangay Sta. Cruz, Marihatag, Surigao del Sur, human kini giingong misulay og pasulod og ilegal nga droga sa maong pasilidad.
Nahitabong ang insidente pasado alas-3 sa hapon niadtong nakalabay adlaw atol sa pag-check sa mga indibidwal nga mosulod sa jail facility.
Gipadayag sa Bureau of Jail Management and Penology (BJMP), nga ang tanang bisita ug mga butang nga dad-on ngadto sa mga persons deprived of liberty (PDL) regular nga ginarehistro ug ginainspeksyon isip kabahin sa ilang standard operating procedure.
Apan atol sa pag-inspeksyon sa maong suspek, nadiskubrehan sa jail guards ang gituohang illegal nga droga ug drug paraphernalia nga giingong gitago sulod sa iyang underwear.
Human sa pag-inventory sa mga nasakmit nga ebidensya, gidala ang suspek ngadto sa Lianga Municipal Police Station alang sa tukmang disposisyon ug dugang nga imbestigasyon.
Atubangon usab sa suspek ang kasong may kalabotan sa Republic Act No. 9165 o Comprehensive Dangerous Drugs Act of 2002.
