Gitangtang na sa Department of Agriculture (DA) ang temporary ban sa pag-import sa industrial manufactured, hermetically sealed, ug heat-treated nga canned pork products, nga kaniadto gipugngan sa pagpasulod sa nasud tungod sa hulga sa African Swine Fever (ASF).
Matud sa DA, base sa ilang risk analysis nga gihimo niadtong Enero, nakita nga negligible o gamay ra ang biosecurity risk sa maong mga produkto, ilabina tungod sa proseso sa heat treatment.
Sumala usab sa World Organisation for Animal Health, ang heat treatment nga labing menus 70 degrees Celsius sulod sa 30 minutos mahimong makapawala sa ASF virus sa karne.
Apan gipasiugda sa DA nga dili tanang imported canned pork products mahimong makasulod sa nasud gumikan ang gihatagan lang ug pagtugot mao lang ang industrial manufactured, hermetically sealed, heat-treated, canned, nga adunay valid registration sa Pilipinas.
Lakip kini sa mga lakang sa gobyerno aron mapadayon ang suplay sa pork products samtang gipanalipdan gihapon ang lokal nga industriya batok sa African Swine Fever.
Photo Courtesy:MSN
