Giklaro sa Commission on Elections (COMELEC) nga dili mahimong malangan ang unang parliamentary elections sa Bangsamoro Autonomous Region in Muslim Mindanao (BARMM) gumikan kay isolated case lang ang shooting incident nga nahitabo ning bag-o lang.
Kahinumduman, niadtong Sabado gi-ambush ang convoy ni BARMM Interim Chief Minister Abdulraof “Sammy Gambar” Macacua sa Barangay Dulangan, Datu Odin Sinsuat, Maguindanao del Norte, apan swerte nga nakalingkawas ra sila ug wala ra maunsa.
Matud ni Comelec Chairman George Garcia, gisusi pa sa mga otoridad kung may kalabotan ba sa eleksyon ang maong insidente, ilabina kay bag-o pa lamang nanumpa si Macacua isip chairman sa Bangsamoro Federalist Party.
Dili pa usab karon makonsiderar sa Comelec nga ibutang ubos sa Comelec control ang Datu Odin Sinsuat aron malikayan ang dugang tensiyon sa maong lugar.
Samtang, adunay na matud pay mga lead nga gisundan ang mga otoridad sa mga suspetsado ug posibleng adunay mga pagdakop sa umaabot nga mga adlaw.
Gipasalig usab sa Philippine Army ang ilang suporta aron masiguro ang malinawon, hapsay ug kasaligan nga pagdumala sa BARMM elections.
Photo Courtesy: Mayor Baba Abas
