Arestado sang mga katapo sang kapulisan ang isa ka suspek bangod sa ginpatigayon sini nga mga pamahog sa social media, nga may kaangtanan sa pagpalupok sang isa ka peryahan sa Isulan.
Natigayon ang pag-aresto pasado alas-1:34 sang hapon sang Agosto 16, 2026, pinaagi sa mga katapo sang Isulan Municipal Police Station, sa koordinasyon sang Tacurong City Police Station kag SKPCRT-RACU 12.
Naghalin ang operasyon sa mga threatening post nga gin-upload sa Facebook sang Agosto 15. May mga pamahog sa pagpalupok kag paggamit sang granada nga nakita sa nasambit nga mga post.
Gilayon nga nakig-angot ang Isulan MPS sa SKPCRT-RACU 12 para sa verification, identification kag pag-localize sang tag-iya sang account. Pinaagi sa technical assistance kag validation, positibo nga nakilala kag nasapwan ang suspek. Gindakop sa hot-pursuit operation ang nasambit nga suspek kag yara na subong sa kustodiya sang Isulan MPS.
Ginapreparar ang kaso batok sa suspek para sa Grave Threats sa idalom sang Article 282 sang Revised Penal Code kag paglapas sa Presidential Decree 1727.
Suno kay Police Regional Office 12 Regional Director PBGen Alan B. Manibog, seryoso nga ginatumod sang kapulisan ang mga pamahog online kag wala sing makalikaw sa responsibilidad bisan pa ini ginahimo sa social media.
Photo Courtesy: PNP Police Regional Office 12
