Ginpatigayon sang 2nd Mechanized Infantry MAKASAG Battalion sang Philippine Army ang isa ka Partners for Peace Meeting sang Agosto 14, 2026 sa Barangay Tual, President Quirino, Sultan Kudarat.
Nagtambong sa nasambit nga dayalogo ang mga commander kag representante sang MILF, MNLF, lokal nga panguluhan kag iban pa nga stakeholders’ para mapalig-on ang pagbinuligay para sa kalinong, seguridad kag pag-uswag sa mga komunidad.
Gintalakay sa nasambit nga pagsinapol ang peace kag security concerns sa Datu Paglas kag Mangudadatu, Maguindanao del Sur, lakip ang pagpugong sang mga conflict kag mga ginatawag nga peace spoilers.
Nagpahayag man sang padayon nga suporta sa Armed Forces of the Philippines ang mga lider sang MILF kag MNLF para mapabilin ang kalinong kag kahapsay sa ila mga komunidad.
Suno kay BGen. Omar V. Orozco, Commander sang 1st Mechanized Brigade, importante ang pagbinuligay sang mga grupo para masiguro ang malinong kag matawhay nga pagpatigayon sang pinaka-una nga Bangsamoro Parliamentary Election.
Isa sa mga highlight sang aktibidad ang pagpirma sang Memorandum of Understanding ukon MOU para sa Partners for Peace Initiative sa tunga sang 1st Mechanized Brigade, MILF kag MNLF.
Pinaagi sa kasugtanan, ginpahayag sang mga partido ang ila kolektibo nga commitment agod malikawan ang problema, pagpalig-on sang kooperasyon kag pagpatukod sang malawig nga kalinong.
