Ginpahayag sang isa ka legal expert nga ang ginatawag nga Senate Leadership Fund isa lamang ka bag-o nga porma ukon “iteration” sang pork barrel nga nagalapas sa Konstitusyon sang pungsod Pilpinas.
Suno kay Atty. Gerard Oliver Wang sa interview sang 88.9 Juander Radyo Tacurong, sa idalom sang 1987 Constitution kag sa desisyon sang Korte Suprema nga kaangay sa kaso sang Belgica vs. Ochoa sang tuig 2013, unconstitutional ang pork barrel ukon PDAF.
Gindugang pa ni Wang, ginapatuman sa pungsod ang “separation of powers” kun sa diin ang katungdanan sang lehislatura amo lamang ang paghimo sang layi kag wala na sila sang papel sa “post-enactment” ukon pagpatuman sang mga proyekto nga para gid sa ehekutibo.
Pagpaathag pa sang nasambit nga abogado, may posibilidad nga maga-atubang sang kaso sa idalom sang Anti-Graft and Corrupt Practices Act kag Plunder Law ang mga opisyal nga may plano kag magmandar sa pag-insert sang nasambit nga pondo.
Bangod sini, ginsuhestyon ang pagpatigayon sang maid-id nga imbestigasyon sang Commission on Audit ukon COA kag Office of the Ombudsman agud maprotektahan ang kwarta sang katawhan.
