Kung ang uban stress-eating, ang usa ka 32-anyos nga babaye sa Japan, nagstress-shopping nga miresulta sa iyang pagkaaresto.
Ang maong babaye usa ka restaurant worker sa Osaka human giingong nakahimo og kapin 2,000 ka online orders sa manga (comic book) merchandise—pero ang problema, wala gyud niya dawata o bayri ang mga produkto. Mas grabe pa, migamit siya og 238 ka lain-laing accounts aron makapadayon sa iyang online ordering spree.
Ang total value sa iyang mga gi-order? Pwerteng dakoa—mokabat sa 4.3-billion-yen o kapin 27 million US dollars!
Pero, dili siya milyonaryo. Kay wala man gyud siya nibayad bisan usa ka sentimo! Usahay, iyang pilion ang cash-on-delivery unya kung moabot na ang delivery rider, “Ay, dili diay ko modawat!”
Sa ubang orders, iyang bayran unta sa convenience store pero pasagdan lang nga ma-cancel tungod kay wala niya kuhaa. Resulta? Napugos ang kompanya sa pag-atubang og delivery ug logistics expenses, samtang ang ubang produkto nga iyang gi-order mahimong makita nga out of stock sa online store.
Giingon sa kompanya nga kapin 7.5-million-yen o mga 47,000 dollars ang ilang direktang net loss tungod sa iyang binuhatan. Sa iyang depensa, miangkon ang babaye nga kapin 2,000 ang iyang orders, apan miingon nga gibuhat niya kini aron makalingkawas sa stress sa adlaw-adlaw nga kinabuhi.
Mao nga kung stress ka, mga higala, ayaw gyud pagsunod ani! Kay basin ang imong gi-order kay manga, pero ang moabot sa imong balay… warrant of arrest!
“Add to cart” kuno ang tambal sa stress—pero sa iyang kaso, nahimong “add to court!”
Photo courtesy: Oddity Central
