Gidasig sa Department of Health Center for Health Development in Northern Mindanao (DOH-10) ang mga indibidwal ug magtiayon nga mokonsulta una sa mga health professional sa dili pa mopili og pamaagi sa family planning aron masabtan ang hustong impormasyon ug malikayan ang mga sayop nga pagtuo bahin sa reproductive health.
Atol sa family planning press conference sa nilabayng semana, mipasabot si Dr. Liova M. De Guia, obstetrician-gynecologist sa Cagayan de Oro City Health Office, nga ang modernong family planning methods gitumong sa pagpugong sa pagmabdos ug dili sa pagtapos niini. Matod niya, makatabang kini sa mga magtiayon sa pagplano kung kanus-a sila magkaanak ug pila ka anak ang ilang gusto depende sa ilang kahimtang.
Giingon usab ni De Guia nga adunay mga misconception bahin sa posibleng epekto sa family planning methods, sama sa pagbag-o sa mood ug pagtaas sa timbang sa mga babaye, ingon man ang pagkunhod sa sexual drive ug testosterone sa mga lalaki nga magpa-vasectomy. Apan, iyang gipatin-aw nga ang mga posibleng side effect hisgutan sa health professionals atol sa counseling aron ang mga indibidwal ug magtiayon makapili sa pamaagi nga angay sa ilang panglawas, gusto ug kahimtang. Gipasiugda usab niya nga shared responsibility sa duha ka partner ang family planning ug ang mga ginikanan mismo ang kinahanglang mopili sa pamaagi nga labing angay alang kanila. Libre usab ang counseling services sa mga local health units ug public hospitals.
Padayon nga gipasiugda sa DOH ang kahibalo bahin sa modernong family planning pinaagi sa ilang mga kampanya nga nag-awhag sa mga magtiayon sa pagplano sa ilang family goals gamit ang hustong impormasyon, pag-atiman sa reproductive health, pagpraktis sa responsible parenthood ug pag-obserbar sa birth spacing nga labing menos duha ka tuig.
Photo courtesy: DOH X
