Naaprubahan na sa ikatulo ug katapusang pagbasa sa House of Representatives ang House Bill No. 10365 nga nagtumong sa pagpalig-on sa Philippine Crop Insurance Corp. (PCIC) aron mahatagan og mas lapad nga proteksyon batok sa pagkalugi ang mga mag-uuma ug mananagat sa nasud. Gipasar ang maong balaodnon pinaagi sa boto nga 201 pabor, walay misupak ug nag-abstein.
Ubos sa nahisgutang balaodnon, dili na lang humay ug mais ang mahimong sakop sa insurance kundili lakip na ang high-value crops, livestock, aquaculture, fishery products, agroforestry crops, ug forest plantations. Lakip usab nga mapanalipdan ang mga makinarya, kagamitan sa pag-uma, transport facilities, ug agricultural infrastructure, ingon man ang life and accident term insurance alang sa mga mag-uuma ug mananagat aron mas daling makabangon gikan sa mga bagyo, kalamidad, ug pag-atake sa mga dangan sa pananom.
Ipatuman usab sa PCIC ang mga makabag-ong sistema sama sa parametric o index-based insurance, samtang gipadayon ang government premium subsidies para sa mga kwalipikadong subsistence farmers nga adunay yuta nga dili molapas sa tulo ka ektarya.
Gipahimug-atan sa Kamara nga ang maong mas lig-on nga insurance system gikinahanglan aron makunhuran sa pag-utang sa mga mag-uuma sa matag higayon nga adunay kalamidad nga moigo sa ilang panginabuhian.
Photo Courtesy: PCIC
