Gikumpirma ni Gilas Pilipinas head coach Tim Cone ang taliabot nga pagretiro sa pambansang koponan sa beteranong sentro ug nine-time PBA MVP nga si June Mar Fajardo.
Sumala ni Cone, ang ikaupat nga window sa FIBA World Cup 2027 Asian Qualifiers na ang katapusang higayon nga magsul-ob sa pambansang jersey ang 36-anyos nga 6-foot-11 nga Sugboanon, hinungdan nga dili na sigurado ang iyang pag-apil sa umaabot nga 20th Asian Games sa Nagoya, Japan.
Gipadayag ni Cone nga dugay nang nagplano si Fajardo nga magretiro sa national team, apan gipangayoan gihapon nila kini og tabang alang sa mga importanteng dula sa maong window. Gihimug-atan sa multi-titled coach ang dako ug importanteng papel sa Sugboanong player alang sa frontline sa Gilas batok sa mga dagkong players gikan sa ubang nasod.
Ang pagretiro ni Fajardo mahitabo dul-an usa ka tuig human usab niretiro sa pambansang koponan si Japeth Aguilar nga nagsilbi sa Gilas sulod sa 16 ka tuig. Nakatakdang makigsangka ang Gilas Pilipinas batok sa Jordan karong Agosto 28 ug batok sa Iran sa Agosto 30, diin ang duha ka dula ipahigayon sa Mall of Asia Arena.
Photo Courtesy: Proballers
