Natala ang 47 katawo namatay human sa pag-igo sa magnitude 7.7 nga linog sa eastern Indonesia niadtong Sabado, Agosto 15. Matod sa National Disaster Mitigation Agency (BNPB), wala pa makaabot ang mga rescue team sa Nagekeo, ang rehiyon nga pinakaduol sa epicenter, tungod sa mga nalandslide nga dalan padulong sa maong lugar.
Matod sa usa ka residente sa East Nusa Tenggara, kusog kaayo ang linog ug napugos sila sa pagdagan aron maluwas ang ilang kaugalingon. Naitala usab ang tsunami waves nga miabot og usa ka metro sa pipila ka lugar, apan gibawi sa mga awtoridad ang tsunami warning human sa tulo ka oras.
Sa datos sa mga rescuer sa Maumere nga adunay 20 ka namatay, unom ang nasamdan ug duha ang natrap sa mga naguba nga epidisyo. Aduna usab mga residente nga gituohang nagpabilin ilalom sa mga nangahugno nga mga building. Lisod usab ang komunikasyon sa lugar nga duol sa epicenter. Tungod sa kadaot sa mga balay, bodega ug mga government buildings, gikinahanglan nga ibakwit ang kapin 2,000 ka residente sa Nagekeo.
Sa press conference, miingon si East Nusa Tenggara Governor Emanuel Melkiades Laka Len nga lima usab ka tawo ang namatay human nangahugno ang usa ka building samtang nangatulog ang mga biktima. Una nga natala sa Indonesian geophysics agency ang linog alas 4:58 sa buntag, nga gisundan sa pipila pa ka aftershocks.
Photo courtesy: The Guardian
