Patay ang duha ka indibidwal nga nag-edad 57 ug 60 anyos human giambush ug gipamusil sa duha ka lalaki samtang nagbiyahe sakay sa ilang motorsiklo sa Sitio Bahucanon, Barangay Cabadiangan, Kadingilan, Bukidnon alas-7:15 sa buntag kagahapon Agosto 15, 2026.
Base sa inisyal nga imbestigasyon sa kapolisan, ang mga biktima pauli na unta aron magpakaon sa ilang mga hayop dihang giatangan sa mga suspek sakay sa itom nga Bajaj nga motorsiklo ug gilayon silang gipamusil kung asa gideklarar nang dead on arrival sa Municipal Health Officer tungod sa daghang samad pinusilan.
Sumala sa nakakita sa nahitabo, nakadungog kini og mga boto ug nakita ang duha ka suspek nga nag-edad sa 40 ug 22 anyos nga dali nga misibat sakay sa ilang motorsiklo paingon sa Barangay Macabenban, Carmen, Cotabato. Personal nga atraso ang gitan-aw sa kapulisan nga nag-unang motibo sa maong krimen batok sa mga biktima.
Sa pagkakaron, nagpadayon ang hot pursuit operation sa Kadingilan MPS sa pakig-alayon sa Carmen MPS aron madakpan ang mga suspek nga nagpabilin pang at-large.
Photo Courtesy: Kadingilan Municipal Police Station
