Kapin sa 30 ka Persons Deprived of Liberty (PDL) sa Bukidnon Provincial Detention and Rehabilitation Center (PDRC) ang kasamtangang nagpadayon sa ilang pagtungha sa Grade 12 pinaagi sa Alternative Learning System (ALS).
Sa usa ka eksklusibong pakighinabi sa Juander Radyo Malaybalay kang Jessie D. Pedros, Teacher III ug Grade 12 Coordinator sa Impasugong National High School, gipahayag niini nga 32 ka PDL ang nagkuha sa TVL Agri-Fishery Arts strand matag Miyerkules hangtod Biyernes.
Gilauman nga moagi sa assessment alang sa National Certificate II (NC II) sa Organic Agriculture ang maong mga PDL ug gikatakdang mograduwar karong Abril human makompleto ang duha ka natabilin nga term ubos sa ilang trimester system.
Matud pa ni Pedros, mikunhod gikan sa kapin 60 ka estudyante noong Grade 11 ang maong matang sa mga nagtungha tungod kay ang uban nakagawas na sa prisohan samtang ang uban mihunong sa pag-eskwela.
Kini ang pinakaunang higayon nga gipatuman ang maong ALS Senior High School nga programa sulod sa PDRC Bukidnon ubos sa pagdumala sa Impasugong National High School gikan sa DepEd Division of Bukidnon. Alang sa mga PDL nga makagawas samtang wala pa nahuman ang klase, gipasalig sa ahensya nga mahimo gihapon nilang ipadayon ang ilang pagtuon sa laing ALS Senior High School pinaagi sa saktong koordinasyon sa DepEd.
Photo Courtesy:PDRC – Bukidnon
