Gipadayon sa Department of Social Welfare and Development (DSWD) pinaagi sa Pantawid Pamilyang Pilipino Program (4Ps) ang pagpalig-on sa suporta sa mga pamilya sa E.B. Magalona aron matabangan silang mahimong mas independente ug adunay malungtarong panginabuhian.
Niadtong Agosto 13, 2026, gipahigayon sa E.B. Magalona Pantawid Office ang profiling sa 206 ka mga panimalay nga nakagawas na sa 4Ps aron masuta ang ilang kasamtangang kahimtang, panginahanglan ug mga serbisyo nga mahimo pa nilang maangkon.
Ang nakalap nga impormasyon gamiton aron mahatagan sila og hustong referral ug linkage ngadto sa mga oportunidad sa panginabuhian, social protection services, skills development programs ug uban pang interbensyon, aron mapadayon ang mga kauswagan nga ilang nakab-ot atol sa ilang pag-apil sa programa.
Samtang, nakigtambayayong usab ang 4Ps sa Negros Occidental Language and Information Technology Center (NOLITC) ug LGU sa E.B. Magalona sa pagpahigayon sa ika-upat nga batch sa NOLITC Contact Center Services Assessment, diin miapil ang 21 ka 4Ps beneficiaries ug kabatan-onan gikan sa lungsod.
Napulo sa mga partisipante ang malampusong nakapasar sa assessment, nga nagpakita sa ilang potensyal ug kaandam sa pagpangita og oportunidad sa industriya sa contact center.
Giyahan ang assessment sa mga trainers sa NOLITC nga sila Mr. Mark Louie Yson ug Ms. Mei-Mei Lonasco, nga naghatag og teknikal nga giya ug suporta ngadto sa mga partisipante.
Matod sa DSWD 4Ps, pinaagi sa padayong pakigtambayayong sa LGU ug ubang partner institutions, tumong sa maong mga kalihokan nga mapalig-on ang kapasidad sa mga pamilya ug kabatan-onan, mapadali ang ilang pag-access sa hustong serbisyo, ug maablihan ang mas daghang dalan padulong sa trabaho, malungtarong panginabuhian ug mas maayong kalidad sa kinabuhi.
Photo Courtesy: DSWD NIR
