Nadakpan ang usa ka BADAC-listed Street-Level Individual (SLI) sa buy-bust operation sa kapulisan sa Barangay 27, Bacolod City, diin nakumpiska ang kapin 20 gramos sa gituohang shabu nga adunay standard drug price nga P136 mil.
Gipahigayon ang operasyon alas 11:42 sa buntag niadtong Agosto 14, 2026, sa Purok Cheriza 1, Barangay 27, pinaagi sa mga operatiba sa Police Station 4 sa Bacolod City Police Office (BCPO), uban sa tabang sa City Intelligence Unit.
Ang suspek giila sa alyas “Ray,” 24 anyos, lalaki, ulitawo ug walay trabaho, ug residente usab sa maong lugar. Nasayran sa mga operatiba pinaagi sa usa ka confidential informant nga giingong namaligya kini og ilegal nga droga sa Barangay 27 ug Barangay Singcang-Airport.
Una nang gipailalom sa kapulisan ang suspek sa casing, surveillance ug validation operations, diin nadiskubre nga nasikop na kini niadtong Pebrero 2021 tungod sa paglapas sa Republic Act 9165 o Comprehensive Dangerous Drugs Act. Nakagawas siya sa prisohan niadtong Disyembre 2022. Sa aktuwal nga buy-bust, nadakpan ang suspek human giabot niini ngadto sa poseur-buyer ang gituohang shabu.
Narekober usab sa operasyon ang usa ka heat-sealed sachet nga gigamit isip buy-bust item, 34 ka heat-sealed sachets nga giingong possession items, usa ka genuine nga P500 buy-bust money, usa ka sling bag ug tulo ka P100 bills nga gituohang halin sa ilegal nga kalihokan sa droga.
Gimarkahan, gi-inventory ug gi-picturehan sa kapulisan ang tanang nakumpiskang ebidensya subay sa hustong proseso aron mapreserbar ang integridad ug custody niini.
Gidala ang nadakpan nga suspek sa Police Station 4 alang sa booking ug hustong disposisyon, samtang giandam na sa mga otoridad ang mga dokumento alang sa pagpasaka sa tukmang kaso.
Photo Courtesy: PRO – NIR
