Giduso ni Senator Erwin Tulfo ang Senate Bill No. 2275 o ang Student Load Discount Act nga nagtumong sa paghatag og 20% discount sa mobile prepaid load, postpaid plans, ug mobile internet packages alang sa mga estudyanteng Pilipino.
Gihimo ang maong balaodnon aron maminusan ang pinansyal nga kargahan sa mga pamilya, ilabina sa mga higayon nga mapugos ang mga eskwelahan sa pagbalhin sa online classes tungod sa dili maayong panahon o ubang emerhensya.
Sumala ni Tulfo, kinahanglan nang mouswag ang sistema sa edukasyon tungod kay ang class suspension kasagaran gihimo na man pinaagi sa online learning aron dili mabalda ang pagtuon sa mga bata. Sakop sa maong sugyot ang tanang Pilipinong estudyante nga naka-enroll sa elementarya, sekondarya, technical-vocational, ug higher education, gawas lamang sa mga nagkuha og post-graduate studies.
Magamit ang 20% discount sa tibuok tuig, lakip na sa sakop nga weekends ug holidays. Aron makabenepisyo, kinahanglan ra magpakita ang estudyante og valid nga school ID o proof of enrollment kauban ang ilang birth certificate. Obligado usab ang mga telecommunication companies sa pagpatuman niini diin adunay pahiangay nga silot alang sa kinsa man ang molapas sa maong balaod
Photo Courtesy: The ASEAN Post
