Nasakmit sa Bureau of Customs o BOC–Port of Clark, uban sa Clark Inter-Agency Task Force Against Illegal Drugs, ang shipment nga adunay 1,706 gramos sa gituohang shabu nga gibanabana og kantidad nga P11.6 milyon.
Gikan sa South Africa ang shipment ug gitakdang ipadala ngadto sa Angeles City, Pampanga diin nadiskubrehan ang gituohang ilegal nga droga human nakit-an sa X-ray Inspection Project sa BOC ang mga kadudahang hulagway sulod sa shipment nga gideklarar isip mga car parts.
Gipailawom usab kini sa K-9 sniff test nga nagpakita og timailhan sa presensya sa ilegal nga droga, hinungdan nga gihimo ang 100 porsyentong physical examination.
Nakaplagan sulod sa duha ka engine pistons ug usa ka tensioner pulley kit ang 17 ka pakete nga adunay puti nga substansiya. Matud sa BOC, ang inisyal nga pagsusi gamit ang Rigaku Spectrometer nagpakita og presensya sa methamphetamine.
Ang mga sample gitugyan ngadto sa PDEA alang sa laboratory examination, samtang giisyu ang Warrant of Seizure and Detention batok sa shipment tungod sa giingong paglapas sa mga probisyon sa Customs Modernization and Tariff Act ug Republic Act No. 9165.
Photo Courtesy: BOC
