Nagpakitang-gilas ang mga Drag Queen gikan sa nagkalain-laing barangay sa Tagum atol sa “Drag Queen: Battle of Divas” nga gipahigayon niadtong milabay’ng adlaw sa Tagum Exhibition Center, Rotary Park.
Gipakita sa mga partisipante ang ilang talento sa impersonation ug lipsync, diin ilang gihatagan og kinabuhi ang mga karakter ug singers nga ilang napili matag kategorya.
Nakuha usab sa mga Drag Queen ang atensyon sa mga nanan-aw pinaagi sa ilang expressive costumes, make-up, ug performance nga nagpakita sa ilang kaugalingong estilo ug personalidad.
Sumala pa, mao na kini ang ikaduhang higayon nga gisaulog sa Tagum City Youth and Sports Development Office ang Pride pinaagi sa Drag Queen competition, nga nagtumong sa paghatag og higayon sa LGBTQIA+ community nga mapakita ang ilang talento ug pagkamamugnaon.
Dugang pa niini, ang mga mananaog sa Drag Queen: Battle of Divas pasidunggan nga ipahigayon karong Agosto 31, 2026 sa Herminigildo C. Baloyo, M.D. Hall.
Ang maong pasidungog magsilbing pag-ila sa ilang talento, paningkamot, ug dakong kontribusyon sa malampusong pagselebrar sa Youth Festival karong tuiga.
Photo Courtesy: City Government of Tagum
