Nakasinati karon ang eastern Japan sa dili ti-aw nga kakusog nga pag-ulan nga miresulta sa kaylap nga pagbaha ug landslide, ug mikalas na og unom ka kinabuhi sa mga tawo ug lain pang lima ka samdan.
Sumala sa mga awtoridad, usa sa mga namatay ang babaye nga naa sa sulod sa iyang sakyanan nga nalubog sa baha, samtang duha usab ka tawo ang na-collapse sa karsada ug sa ulahi namatay kini.
Tungod niini, kapin 100 mil ka residente ang gi-abisohan nga mobakwit sa ilang mga lugar human sa mga natala nga landslide ug pagkawala sa suplay sa kuryente tungod sa kusog nga pag-ulan.
Kapin 20 mil ka panimalay ang nawad-an og kuryente, samtang mga 7 mil ka biyahero ang na-stranded tibuok gabii sa Narita Airport sa Tokyo. Sa Chiba, duol sa Tokyo, nakatala og kapin 100 millimeters nga ulan kada oras sukad Huwebes sa hapon.
Nag-isyu na usab ang lokal nga mga awtoridad og Level Five Emergency Warning, ang pinakataas nga alerto, niadtong Huwebes, apan gipaubos kini sa Level Four gahapong adlawa sa buntag. Bisan pa niini, nagpabilin ang pahimangno batok sa posibleng landslide ug pagbaha.
Photo Courtesy:The Japan Times
