Nakabsan sa kinabuhi ang 4-anyos nga bata nga si “Maya” human giingong gihiloan sa iyang kaugalingong lola nga si Vicenta Achas, 52 anyos didto sa Don Carlos kagahapon, Agosto 14, 2026.
Bisan pa man nga nagdako ang bata sa pag-atiman sa iyang lola, nahimong trahedya ang tanan sa dihang gisagolan sa lola og zinc phosphide o hilo sa ilaga ang gatas sulod sa biberon sa bata sa wala pa kini nag-inom usab sa maong hilo sa tuyo nga tapuson ang ilang duha ka kinabuhi.
Gibutyag sa pakighinabi sa Juander Radyo Malaybalay kang PLT. Rufina S. Bayarcal, Deputy Chief of Police sa Don Carlos, nga nagagikan sa gubot sa pamilya ang maong panghitabo human nag-away ang lola ug lolo sa bata. Dali nga gipangdala ang duha sa Bukidnon Provincial Hospital sa Maramag, apan nabugtoan gyud sa kinabuhi ang bata nianang sayo sa buntag samtang ang lola padayon pang giobserbahan sa ospital.
Sa kasamtangan, ang lawas sa bata gipahimutang na sa usa ka punerarya sa Don Carlos samtang gipaabut na lamang sa mga awtoridad ang pag-ayo sa lola aron pormal nga mapasaka ang haom nga kaso batok kaniya.
Nagpahimangno usab ang kapulisan sa publiko nga bililhon kaayo ang kinabuhi ug dili unta ipatigbabaw ang kainit sa ulo ug kaputong sa higayon nga mag-atubang og problema sa pamilya.
Photo Courtesy: Don Carlos MPS
