Patay ang driver sa motorsiklo samtang laing duha ka mga bata ang nangasamdan human nabangga (head-on collision) batok Suzuki Multicab sa barangay road sa Mibando, Poblacion, Quezon, Bukidnon pasado alas-7:00 sa gabii, Agosto 13, 2026.
Nailhan ang driver sa motorsiklo nga si Julius D. Pigte, 42-anyos, satamng ang iyang duha ka anak nga nag-edad og 16 ug 12 gidala sa Quezon Health Center Infirmary alang sa pagtambal. Gimaneho ang Multicab ni Renanto Coming Raturil, 50-anyos, kinsa nakaangkon usab og minor nga samad ug gidala sa Pahilan Hospital.
Base sa pamahayag sa usa ka saksi sa dapit, nagbiyahe sa magkaatbang nga direksyon ang duha ka sakyanan dihang giingong misulod ang Multicab sa lane sa motorsiklo, diin gituohang ubos sa impluwensya sa ilimnong makahubog atol sa maong insidente.
Sa kasamtangan, parehong adunay dakong kadaot ang duha ka sakyanan ug anaa na sa kustodiya sa Quezon Municipal Police Station alang sa saktong disposisyon. Samtang padayon ang gihimong imbestigasyon sa hinungdan sa aksidenti.
Photo Courtesy: Quezon Municipal Police Station
