Gihatagan og Safe Conduct Pass (SCP) ang 74 ka kanhi rebelde atol sa seremonya nga gipahigayon niaging Agosto 11, 2026 sa 1st Special Forces “Hunter-Killer” Battalion sa Barangay Mampayag, Manolo Fortich, Bukidnon. Ang kalihokan gitambongan sa representante sa 4th Infantry “Diamond” Division ug mga opisyal sa 403rd Infantry “Peacemaker” Brigade.
Ang Safe Conduct Pass (SCP) usa ka mekanismo sa gobyerno nga nagtumong sa paghatag og luwas nga pagbiyahe sa mga kwalipikadong kanhi rebelde samtang nagproseso sila sa pag-avail sa amnesty program. Pinaagi niini, gitugotan sila sa luwas nga paglihok ug proteksyon batok sa pagdakop sulod sa proseso, isip kabahin sa ilang pagbalik sa mainstream nga katilingban.
Gipasiugda sa 403rd Infantry Brigade nga ang pag-isyu sa SCP nagpakita sa paningkamot sa gobyerno sa pagpalig-on sa healing ug reconciliation, ilabina alang sa mga kanhi miyembro sa armadong grupo nga mipili sa pagbalik sa komunidad.
Padayon usab ang 403rd Infantry Brigade ug mga partner nga ahensya sa pagpatuman sa mga programa alang sa kalinaw, reintegration ug reconciliation sa Bukidnon, isip kabahin sa mas lapad nga paningkamot sa pagtapos sa lokal nga armadong panagbangi ug pagpalambo sa inclusive development.
Photo Courtesy:403rd Infantry “Peacemaker” Brigade
