Nadakpan sa kapulisan ang suspetsado nga responsable sa pagpamusil sa usa ka lalaking komprador ug puthaw sa gilusad nga hot pursuit operation sa Purok Paglaum, Barangay Santa Lucia, Pagadian City, kagahapon, Agosto 13, 2026.
Gihimo ang pag-aresto sa suspetsado nga si alyas “Pahak” human gikataho nga namusil kini sa biktima nga nagpangidaron ug 18 anyos nga nakaangkon ug samad pinusilan sa tiyan.
Dali nga gidala ang biktima sa nagpakabanang mga indibidwal sa pinakaduol nga tambalan ug karon anaa na usab sa luwas nga kahimtang.
Nakumpiska sa kapulisan gikan sa suspetsado ang caliber .38 revolver nga adunay lima ka buhing bala ug duha ka sachet sa gituohang shabu nga nakuha mismo sa iyahang possession.
Human sa operasyon, ang suspetsado lakip ang nakumpiskang butang gidala sa Pagadian City Police Station alang sa tukmang disposasyon diin gisubmitar usab ngadto sa Zamboanga del Sur Provincial Forensic Unit ang armas alang sa forensic examination.
Photo Courtesy:ZSPPO
