Nakadawat og indemnity check gikan sa Philippine Crop Insurance Corporation (PCIC) Region 9 ang mokabat sa 10,447 ka mga mag-uuma sa Zamboanga del Sur.
Segun ni Edilberto Dondoyano, Division Chief III sa Claims ang Adjustment Division, nanguna pa gihapon ang Zamboanga del Sur nga mga mag-uuma nga nabayaran sa mokabat P44, 466, 207.13 nga gisundan sa Zamboanga Sibugay ug Zamboanga del Norte.
Ang indemnity mao ang pinansyal nga tabang nga gihatag sa PCIC ngadto sa mga insured nga mag-uuma nga nakasinati og kadaot sa ilang mga pananom tungod sa mga insidente nga sakop sa ilang crop insurance.
Gipasiugda usab ni Dondoyano ang importansya sa pag-insured sa mga pananom aron adunay proteksyon ang mga mag-uuma batok sa mga risgo sama sa bagyo, baha, hulaw, peste ug uban pang mga katalagman.
Padayon usab ang panawagan ni Dondoyano sa tanang mga mag-uuma sa tibuok rehiyon nga siguraduhon ang pagparehistro sa ilang mga pananom aron masiguro ang ilang proteksyon ug pinansyal nga seguridad kung adunay kalamidad.
