Pormal nga gitunol sa Land Bank of the Philippines–Bukidnon Lending Center ngadto sa Kagamhanan sa Dakbayan sa Valencia ang Notice of Loan Approval (NOLA) alang sa ₱2.74-bilyong term loan facility niadtong Agosto 10, 2026. Mainiton kining gidawat ni City Mayor Azucena “Amie” Galario kauban si City Spokesperson Jun Galario, diin ang maong pundo maoy magsilbing taytayan sa pagpatuman sa nag-unang mga imprastraktura ug serbisyo publiko sa dakbayan.
Gamiton ang maong dakong gahin sa mga importanteng proyekto lakip na ang pagtukod sa bag-ong Valencia City Hall, ingon man ang rehabilitasyon, pagpalapad, ug pag-upgrade sa mga pasilidad sa Valencia City Good Samaritan General Hospital aron mahimong Level 1 hospital.
Sakop usab sa loan ang pagpalambo sa mga evacuation center, rehabilitasyon sa mga pampublikong pasilidad, strategic land acquisition, ug pagpalit og mga heavy equipment, medical equipment, ug mga solar lightings.
Gilauman nga sugdan na dayon ang mga pre-bid ug bidding activities alang sa maong mga proyekto subay sa saktong proseso sa procurement. Kabahin kini sa hiniusang paningkamot sa lokal nga panggamhanan aron mapalig-on ang imprastraktura, healthcare, disaster resilience, ug ang kalidad sa kinabuhi sa katawhan sa Valencia.
Photo Courtesy: LGU – Valencia City
