Giawhag sa Provincial Veterinary Office (PVet) ang tanang Municipal Agriculturist ug City Veterinarians sa nagkalain-laing Local Government Units (LGUs) sa probinsya sa Bukidnon nga mas pahugtan pa ang pag-monitor ug surveillance sa mga binuhing baboy.
Kini nga lakang gipatuman ubos sa Technical Advisory No. 1 s. 2026 aron maprotektahan ang kahayupan batok sa posibleng hulga sa transboundary animal diseases nga mikuyanap pinaagi sa paak sa lamok.
Atol sa gipahigayong panagtigom sa Bukidnon Livestock Extension Workers (BLEW) niadtong Agosto 11, 2026, gipasiugda sa PVet ang kamahinungdanon sa hugot nga kooperasyon ug dinalian nga pagtaho sa matag LGU. Gihangyo ang mga opisyal nga ireport dayon ang bisan unsang dili ordinaryo nga sintomas o clinical signs nga makita sa mga baboy aron mapugngan ang pagkatag sa maong sakit.
Gawas sa pagpahugot sa pagpaniid sa kahayupan, gihisgotan usab sa maong panagtigom ang mga proposed resolutions sa Provincial Beef Cattle Council, mga umaabot nga programa sa animal health, ug mga accomplishment reports. Tumong sa maong panagtagbo nga mapalig-on ang koordinasyon sa gobyerno alang sa padayong pagpalambo ug pagpanalipod sa tibuok industriya sa kahayupan sa Bukidnon.
Photo Courtesy:PVET – Bukidnon
