Nasikop sa mga personahe sa Malaybalay City Police Station ang 45-anyos nga lalaki human kini naaktuhang nagdala og armas ug hinagiban sa Purok 6B, Barangay Aglayan, Malaybalay City bandang alas-7:00 sa gabii nilabayng Agosto 10, 2026.
Nagsugod ang operasyon dihang nakadawat og taho ang mga nagpatrolyang kapulisan gikan sa usa ka concerned citizen bahin sa usa ka hubog nga lalaki nga dayag nga nagbitbit og armas sa publikong lugar.
Sa pag-abot sa mga otoridad sa dapit, misulay pa kini sa pagsukol ug pagsuk-sok sa armas sa iyang hawak dihang gipangayuan og legal nga dokumento, apan dali ra kining napugngan ug naposasan sa mga mirespondeng kapulisan.
Narekober gikan sa suspek ang usa ka caliber .45 pistol nga may markang “Springfield Armory” nga dunay magasin nga kargado og pito (7) ka bala. Dugang pa niini, nakuha usab gikan sa iyang sling bag ang usa ka mahait nga hinagiban nga nailhang “lugud.”
Ang dinakpan anaa na karon sa kustodiya sa kapulisan ug nag-atubang sa mga kasong pagsupak sa Republic Act 10591 (Comprehensive Firearms and Ammunition Regulation Act) ug Illegal Possession of Bladed Weapons.
Photo Courtesy: Malaybalay City Police Station
