Gipahinumdoman sa Department of Education (DepEd) ang tanang magtutudlo ug kawani niini nga magpabiling propesyonal ug mopatigbabaw sa hustong pamatasan sa paggamit sa social media. Pinaagi sa usa ka memorandum nga gipagawas niadtong Agosto 11, giklaro sa ahensya nga bisan pa og naka-private ang account sa usa ka personahe, sakop gihapon kini sa mga etikal ug propesyonal nga sumbanan, ilabi na sa mga post nga may kalabotan sa mga estudyante, kalihokan sa tulonghaan, ug opisyal nga mga katungdanan.
Kini nga pahimangno gihimo human makadawat ang DepEd og mga taho kabahin sa mga post sa pipila ka magtutudlo nga nakalapas sa maong sumbanan. Hugot nga gipasidan-an ang mga magtutudlo nga mag-amping sa paghimo og content gamit ang ilang mga tinun-an aron malikayan ang pagbutang kanila sa peligro sa pagbiay-biay, harassment, ug grabeng pagsaway sa publiko nga posibleng makadaot sa ilang kaayohan.
Dugang pa sa ahensya, gidid-an usab ang mga empleyado sa paghimo og personal nga pag-atake sa ilang mga kaubanan, pagpakatap og sayop nga impormasyon o fake news, ug bisan unsang binuhatan nga makadaut sa reputasyon sa institusyon. Gipasiugda sa DepEd nga bisan tuod bukas ang social media sa mga diskusyon sa mga napapanahong isyu, dili kini angayng gamiton sa pamaagi nga makalapas sa dignidad sa mga estudyante ug sa propesyon
Photo Courtesy:DepED
