Nadakpan ang upat ka mga suspek nga giingong nalambigit sa pagpamusil sa gipahigayong hot pursuit operation sa Bislig City niadtong hapon sa Agosto 9, 2026.
Nahibaloan sa Bislig City Component Police Station ang insidente pasado alas-2:50 sa hapon human adunay concerned citizen nga mitaho sa pagpamusil sa Purok 1, Gamaon District, Barangay Mangagoy. Dali nga miresponde ang mga personnel sa Bislig CCPS nga gipangulohan ni PMAJ John Zydrick A. Preciados, ubos sa direktang pagdumala ni PLTCOL Jassen N. Tuario, aron susihon ang nahitabong insidente.
Sa pag-abot sa mga pulis, nasuta nga ang biktima, usa ka 36-anyos nga construction worker ug gidala na sa Bislig District Hospital aron matambalan. Base sa inisyal nga imbestigasyon, didto sa iyang balay ang biktima dihang adunay wala mailhing tawo nga nanuktok sa iyang pultahan.
Human makumpirma sa suspek ang identidad sa biktima pinaagi sa pagpangutana sa iyang ngalan, kalit kining gipusil kaduha ug naigo ang biktima sa iyang wala nga bukton. Nakalikay pa ang biktima sa dugang pagpamusil ug misulay og panimalos, hinungdan nga miikyas ang suspek uban sa iyang mga kauban padulong sa Barangay Tabon.
Misugod dayon ang kapulisan sa CCTV backtracking operation aron masubay ang agianan sa mga suspek. Pinaagi sa CCTV footage, nasubay sa mga pulis ang ilang pag-ikyas hangtod nga nadiskobrehan ang giingong tagoanan sa mga suspek.
Gipadayon ang hot pursuit operation hangtod malampusong nadakpan ang upat ka mga indibidwal nga giila pinaagi sa ilang mga alyas nga sila si “Jun-Jun,” 31 anyos, residente sa Purok 4, Union Site District, Mangagoy; “Gil,” 44 anyos, residente sa Purok 5, Tabon; “Nonong,” 35 anyos, residente sa Purok 4A, Tabon; ug “Jay,” 60 anyos, residente sa Purok 7, Post 12, Barangay Tabon, Bislig City.
Lakip sa mga nakumpiska ang usa ka .357 Magnum revolver nga adunay duha ka fired cartridge cases ug duha ka live ammunition; usa ka .357 caliber fired cartridge case ug slug; usa ka .38 caliber revolver nga adunay upat ka live ammunition ug usa ka fired cartridge case; usa ka .45 caliber pistol nga adunay gitangtang o gi-deface nga markings; ug usa ka magazine nga adunay walo ka live ammunition para sa .45 caliber.
Narekober usab sa kapulisan ang pito ka heat-sealed transparent plastic sachets nga adunay gituohang shabu. Apil usab sa narekober ang usa ka green plastic container ug tulo ka glass tube pipes.
Gidala ang mga nadakpan sa Bislig CCPS alang sa booking, dokumentasyon ug hustong disposisyon samtang giandam ang tukmang mga kasong kriminal batok kanila.
Photo courtesy: SDSPPO
