Lima ka tawo ang naluwas samtang pito pa ang padayon nga gipangita human sa landslide sa Guidag-Surong, Baguio City niadtong nakalabay nga adlaw, tungod sa kusog ug padayon nga pag-ulan.
Sumala sa Baguio City Public Information Office, nahitabo ang landslide pasado alas 7 sa gabii ug natabunan sa nalandslide nga yuta ang tulo ka balay nga gipuy-an sa lima ka pamilya.
Base sa impormasyon sa Baguio City Police Office, pito ka tawo ang wala pa makit-i human matabonan sa yuta ang mga balay. Pito ka tawo ang nagpuyo sa unang balay, duha sa ikaduhang balay, ug tulo sa ikatulong balay.
Pag-abot sa alas 8:59 sa gabii, upat na ka tawo ang nakit-an ug naluwas, lakip ang duha ka babaye nga usa niini bata, ug duha ka hamtong nga lalaki. Gidala dayon sila sa ospital alang sa medical treatment. Pag-abot sa alas 9:40 sa gabii, nadugang pa og usa ang naluwas, busa nahimong lima ang kinatibuk-ang nailuwas.
Padayon naman ang search and rescue operation sa lugar nga gipangulohan sa mga personnel sa City Disaster Risk Reduction and Management Office, Baguio City Fire Station, Baguio City Police Office ug mga barangay first responder.
Gimando usab ni Baguio City Mayor Benjamin Magalong ang pagpadayon sa operasyon aron dali nga makit-an ang pito pa ka tawo nga gipaabot nga anaa sa ilawom sa nidahili nga yuta.
Photo Courtesy: Philippine News Agency
