Kapin 154,000 ka botante ang natala sa Commission on Elections (COMELEC) Pagadian City alang sa umaabot nga Barangay ug Sangguniang Kabataan Elections (BSKE).
Kini subay sa gipagawas nga datos ni Election Officer IV Atty. Jed Labador, atol sa pakighinabi sa Juander Radyo News Team niining mga miaging adlaw. Sumala ni Atty. Labador, gamay lamang ang nadugang sa gidaghanon sa mga nagparehistrong botante, tungod kay daghan ang na-deactivate, samtang mas ubos usab sa gilauman sa COMELEC Pagadian ang gidaghanon sa mga bag-ong botante nga nagparehistro.
Segon niya, human sa voter registration, misugod na usab ang COMELEC Pagadian sa pagpangandam alang sa umaabot nga piniliay. Gani, kapin 400 ka polling precincts sa syudad ang ilang na-validate nga posibleng gamiton alang sa Barangay ug Sangguniang Kabataan Elections nga gikatakdang ipahigayon sa Nobyembre 2.
Samtang, gidasig ni Atty. Labador ang tanang botante sa syudad sa Pagadian nga siguruhon ang ilang impormasyon sa voters list ug magpabiling updated sa mga pahibalo sa COMELEC Pagadian kabahin sa umaabot nga BSKE.
